شخصيات الفيسبوك

بعد فترة على الفيسبوك قدرت اطلع الشخصيات العامة في الفيسبوك و شنو نظامهم وهم كالتالي:

1- النوع المتحلطم واللي كله مو عاجبه. واهو انا والله يعينكم علي.

2- النوع الرومانسي. هالنوع اللي ما سهمته الا يحط كلمات اغاني و عادة هالكلمات تكون من نوع "خنتيني" "روح انا ما ابيك" و "اللي بعيد عن العين بعيد عن القلب" مشكلة هالنوع انك مع الوقت ودك تسويله بلوك لانه ما عنده غير هالسالفة.

3- النوع اليوتيوبي. عاد هذا الطامة الكبرى. يجابل اليوتيوب وكل فيديو يشوفه يسويله شير بالفيسبوك لما يترس صفحتك. عادي اتشوف صفحتك فيها 12 أو 13 فيديو. يا حبيبي خف علينا شوي.

4- النوع اللي يطرح اسئلة نقاشية وعادة تكون اجتماعية من نوع "شنو احسن سن للزواج؟" "اشرايكم باللي يخون زوجته؟"

5- النوع اللي ما عنده شغل الا كل ما يبي ياكل يصور صحنه و يحطه بالفيسبوك. يا حلاتك والله احب هالنوع

6- النوع السياسي اللي ما يتكلم الا بالسياسة و شايل هم الديرة فقلبه. اقول خف لا تنسحب امن الدولة ترا هالايام محللين معاشهم.

7- النوع الفلسفي اللي يقتبس مقولات الأئمة أو الفلاسفة واللذي منه. عاد اطبقون اللي تنقلونه ولا بس بهرجة؟

8- النوع الغثيث اللي كل ما طقع طقعة قال عنها بالفيسبوك. "بالفراش بنام" "توني قاعد من النوم"، "حصران" "يوعان" "داق السيارة سلف بطلع"

9- النوع المشابه واللي يكون شوية مفهي واهو نوع التايم. "موفي تايم" طلعة تايم" "قزة تايم" "حمام تايم".

10- النوع الديني اللي عايش الفلم واغلبه عن طريق اليوتيوب. "الله اكبر انظروا كيف جناح هذه الفراشة على شكل كلمة الله"، "الله اكبر انظروا كيف هذا اليهودي قد اسلم"، "الله اكبر انظروا كيف هذه السحابة على شكل كلمة محمد" ترا والله هالشغلات ما راح ادخلكم الجنة.

11- النوع اللي يسلم وهم هذا النوع حبيب يدل على طيبة قلبه. "صبحكم الله بالخير"، "مساكم الله بالخير"، "تصبحون على خير". هالنوع اذا تعرفه شخصيا راح اتشوف انه حبيييييب ومعشره حلو.

12- النوع المجسم واللي كله فارش عضلاته بالفيسبوك. اقول بلى مهايط بس

13- النوع المغاير من جنس حواء واهي اللي يا حاطة براطمها ولا عين وحدة ولا متلثمة بشماغ. اقول استريحي.

14- النوع المغازلجي واللي داش الفيسبوك عشان يضبط.

أقول قولي هذا واستغفر الله لي ولكم