اتيكيت النوادي

بما اني قاعد بالدوام وما عندي شغل

وبما ان ماكو احد اسولف وياه

حبيت اكتب عن اتيكيت النوادي الصحية

اي نعم اتيكيت النوادي 

لازم الشخص يستخدم الاتيكيت بجميع نواحي حياته وللأسف بنوادي الكويت الناس ما عندها أي اتيكيت وراح اتعرفون شنو اقصد.

1- رد أوزانك مكانها

بعد ما تخلص تمرينك على البار والدمبل، خلك خوش واحد وشيل الأوزان من البار وردها مكانها ولا تهد الدنابل على الأرض. انا ياي اتمرن مو ياي اشيل اوزانك من وراك ولا ادور الدنابل وين محذوفة.

2- الأجهزة مو علاق حق فوطة جنابك ورف حق اغراضك

أكره ما عندي لما ايي اتمرن على جهاز ولى ألقى عليه فوطة معلقة أو اغراض وسويجات على المقعد. اذا جنابك مو قادر تستغني عن اغراضك اكو اختراع اسمه جنطة خصر وفوطتك علقها على جتفك.

3-القعدة عالجهاز

اذا جنابك خلصت تمرين من جهاز أ ليش اتكي على جهاز ب؟ يعني لازم تنحط بموقف محرج واييك واحد ويقول لك قوم؟

4- العرق عالاجهزة

يا انك تحط فوطة تحتك عالجهاز او انك تمسح العرق من عقب ما تخلص.  مو تمشي من الجهاز وتخلي وراك برجة عرق.

5- لا تضغط عالاوادم

ذاك اليوم بغيت ارقع واحد من كثر ما يحن على راسي. خلصت ولد عمي؟ جم جولة باقي لك؟ بعد شوي ها خلصت؟ اذا خلصت بتشوفني قاعد عالجهاز؟

الاسلوب الثاني والأحقر اهو انه يوقف على راسك واهو ساكت ويخزك. يعني افهمها وقوم

الحل: يا انك تسئلني ادش وياك بالجولات أو تنطره وانت ساكت

6- لا تصير مدرب 

اذا النادي ما عينك مدرب فلا تتليقف واتعلم الناس شلون تتمرن. 

مثال: بحكم ممارستي للفنون القنالية فتمارين الفسخ لازم اسويها على طول وتحت اشراف مدربي ليما قمت اعلم الاعبين اليدد شلون يسوونها. واييني واحد بنادي بلاتينيوم عقب 10 سنوات من الممارسة يقول ولد عمي قاعد تسوي غلط.

خل يحمد ربع اني عطيته خزة وسكت بس

7- النادي مو دوانية

اللي ياي النادي بهدف التمرين مو بهدف التعارف. خل محادثاتك وسوالفك قصيرة ولا تأذي اللي حاطين هيدفون على راسهم. واضحة انه مو ياي يسولف

8- ترك فوطة النادي على الأرض

اهلق ما خلق ربي اهو اللي يطلع من الشور ولاف نفسه بفوطة النادي، يلبس صرواله من تحت الفوطة قبال الأوادم يشيل الفوطة ويقطها عالارض ويلبس باجي ملابسه ويمشي. والمشكلة ان المكان اللي تنتجمع فيها الفوط المستخدمة على بعد متر من ايده

9-الملابس

سؤال: اللي يتمرن بالنادي بجينز بعرف شلون يفكر؟

ولا الأقوى وشوف عيني، قاعد يدق حديد بقميص وجينز

وتكفى عزيز الذكر، ماله داعي تتمشى بستريج و تي شيرت قصير. ما ابي اقول شنو المنظر الوصخ اللي انت قاعد تتمشى فيه

10- الصراخ:

انك تشيل وزن ثقيل وتطلع صوت تنبلع. بس آآآآآآآآآه آآآآآآآآآههههههه آآآآآآآآآآآهههههههه حدها مالها داعي لأنه شكلك وايد غبي وانت تسويها. 

11- الريحة

تكفى حط ديودرنت. ماله داعي افصل اكثر من جذي

12- برادة الماي

اذا شفت وراك طابور عالبرادة ممكن تصير مؤدب وما تترس غالون الماي اللي يايبه وياك حق البروتين. سوها لما يمون ما في دور

13- المنظرة

شكلك اغبى منه ماكو وانت تستعرض عضلاتك قبال المنظرة والناس اطالعك. سوها فبيتكم

للأسف هالمظاهر وايد منتشرة بالنوادي ويا ليت عندكم اتيكيت

مراحل تحول المرأة من محجبة إلى سفور

هالحالة الطماشة مرت على أكثر من مرة واهي المتحجبة مشتهية اتصير سفور بس مستحية. ليش مشتهية ومستحية؟ لأنها ما تشيل الحجاب على طول انما تمر على مراحل وهالمراحل تاخذ لها فترة طويلة وعلى مدى اكثر من سنة.

قبل لا انشو المراحل أول شي خل نعرف الحجاب: حجاب المرأة هو ستر كامل الجسم من الرأس إلى القدمين ما عدا كشف قرص الوجه و الكفين ولبس الفضفاض بحيث لا تظهر معالم وتقاسيم الجسم وعدم التبرج. هذا الحجاب الصحيح.

الحين خل نستعرض مراحل فصخة الحجاب من قبل المتحجبة حجاب صحيح وهالمراحل مو شرط تكون بالترتيب اللي راح احطه. يعني ما يمنع ان شي يصير قبل شي

1-حجاب صحيح: كل شي مستور حسب الشريعة الإسلامية.
2- بداية الخوارة: رفعة الاكمام بحيث انها بدل لا تكسف الكف فقط قام يطلع نص الذراع.
3- الحجاب وفجأة ارتخى وقامت تبين القذلة
4- الحجاب قام يسيح والرقبة قامت تبين.
5- الملابس كل مالها وتصير اضيق واضيق
6- الحجاب تحول إلى عمامة بحيث ان الوجه والرقبة مكشوفين بس الشعر اهو اللي مغطا
7- دلعة الصدر كل مالها وتنزل

طبعا الحين البنت صارت مسخ لا اهي سفور ولا اهي متحجبة وما أدري قاعدة تقص على منو.

8- سفور كامل. بالمبارك

طبعا الغرض من هالمقالة اهو التندر وبالنهاية هالأمر يرجع الى حرية المرأة لكن نصيحتي لج يا المتحجبة ياللي مليتي من الحجاب انج تقطينه سيدة وبلا مخادعة النفس هذي.

وبالنهاية ما اقول الا درب العبادة طويل

Don't forget to follow me on twitter @bo_hamad82

هل فيسبوك تحولت إلى شركة قابضة؟

في عام 2004 انطلق موقع فيسبوك للتواصل الاجتماعي وبفترة قياسية اصبح هالموقع ظاهرة عجيبة غريبة في الانتشار حتى اصبح جزء لا يتجزأ من حياتنا وخلى صاحبه مارك زكربيرج اصغر ملياردير بالعالم.

يتيح لك فيسبوك انك تشارك اصدقائك بالموقع بخواطرك وصورك و تشاركهم الفيديوات اللي تشوفهم بيوتيوب وتلعب معاهم العاب وبالفترة الاخيرة تشاركهم موقعك. وطبعا ظهر لنا نوع إدمان جديد وهو إدمان الفيسبوك لأنه يشبع غريزة الانسان بالتواصل الاجتماعي.

ولكن بعد ظهور الايفون في 2007 وانتشاره بشكل رهيب في 2009 مع ما يحمله من ابلكيشنز، الناس قامت يقل وقتها الجلوس على الكمبيوتر بما ان اصبح الانترنت والبرامج بجيبها بدا نجم فيسبوك يأفل وخصوصا بعد ظهور الابلكيشنز اللي تحمل اجزاء من خدمة فيسبوك.

فخدمة مشاركة الخواطر او الافكار او سمه ما شئت مع المتابعين ظهرت في تويتر سنة 2006 ولا ننسى ان تويتر طلع ابلكيشن قبل فيسبوك وابلكيشن تويتر وايد ساعد في انتشاره.

خدمة مشاركة الموقع ظهرت مع فورسكوير و اللذي على شاكلته

خدمة مشاركة الصور انتشرت انتشار رهيب مع انستاغرام.

الابلكيشنز هذي كلت الجو على فيسبوك حتى صار فيسبوك هبة قيدمة.

فيسبوك حست بالخطر فشرت قبل جم اسبوع ابلكيشن انستاغرام بصفقة خيالية بمبلغ وقدره مليار ودولار وبعدها بفترة قصيرة شرت ابلكيشن مشاركة المواقع والاهتمامات والمسمى بجلانسي بمبلغ لم يتم الافصاح عنه.

هذا مؤشر ان فيسبوك قامت تعي بأهمية الموبايل ابلكيشنز وحست ان الناس قامت تفضل الابلكيشنز المتخصصة مو مثل ابلكيشن فيسبوك اللي يحوي جميع ما سبق.

انا اتوقع في المستقبل القريب فيسبوك راح تصير شركة قابضة من بعد ما بلشت مؤسسة شخصية للتواصل الاجتماعي وراح تستحوذ على المزيد من الابلكيشنز الناجحة

العقلية الازدرائية تتغلغل في دولتنا

امس وانا بالسيارة شغلت الراديو على اذاعة الكويت والمقصود بإذاعة الكويت هي إذاعة الدولة الرسمية. البرنامج كان عن الطب البديل وكان الضيف يتكلم عن الزنجبيل وأفضليته على نبتة الجنسنج. راح اقتبس كلمته اللي قالها وهي "الزنجبيل فوائده اكثر من الجنسنج و سبب غلاء نبتة الجنسنج في آسيا يعود الى اسباب دينية. فالبوذ يعتقدون ان كل ما شابهت نبتة الجنسنج لشكل الانسان تزيد فوائده وفي الحقيقة هذه سفاهة عقلية والحمدلله على نعمة العقل والاسلام"

جملة الاخ الخيرة تحمل ازدراء للديانة البوذية بكل ما تحمله الكلمة من مهنى والمشكلة في بثت في اذاعة الدولة الرسمية.

كان المفترض من الاخ اين يقول "غلاء سعر الجنسنج سببه ديني بحت وعود الى معتقد بالديانة البوذية" وانتهى. لكن هذا اللي احنا نعاني منه، العقلية الازدرائية.

خل نقلب الطاولة عليك اخي المزدري، شنو بيكون شعورك لو بوذي طالع فبرنامج ويقول "ان سبب الطلب على نبتة الاراك في الجزيرة العربية هو سببه الديانة الاسلامية حيث يستخدمونه لتنظيف الاسنان وهذه بالحقيقة سفاهة عقل حيث ان لحاء الجوز افضل من الاراك والحمد لبوذا على نعمة العقل"

طبعا بتثور ثائرتك وبتحلل دم المتحدث وبتقول الاسلام دين الحق.

ردا عليك بيقول لك ذاك ان البوذية هي دين الحق وبندور بدوامة الى غير نهاية.

زبدة الكلام انه لا ينبغي عليك ان تقيم اديان الناس من منطلق دينك انت لان كل كلمة بتقولها راح تكون مردودة عليك من منطلق دينه اهو.

لو كل الناس بتفهم هالكلام جان الله فكنا من ازدراء الاديان وازدراء معتقدات الغير ونفتك من الشحن الطائفي

Don't forget to follow me on twitter @bo_hamad82


- Posted using BlogPress from my iPad

ماكجكني وافتخر

قبل ٤ او ٥ سنوات طلع لنا معرض أُطلق عليه كويتي وأفتخر. طبعا توقعنا أن المعرض عبارة عن إنجازات الكويتيين في المحافل الدولية ورفع إسم الكويت. ولكن اكتشفنا إن غالبية المعرض هو عبارة عن ناس تسوي كب كيك و خلطات ريدبل واللذي منه. يعني باختصار معرض مشاريع صغيرة.

عقب هالاكتشاف صار المعرض هدف للطنازة والضحك للكويتيين.

سبب كتابتي هالبوست هو بعض الفطاحل في تويتر اللي يقولون بدال لا تتحلطمون سووا شي مثلهم والسبب الثاني هو نقاش دار في الدوانية والموضوع هو ليش نطنز عليهم؟

بس علشان نكون واضحين، طنازتنا على اسم المعرض وليس على المشاركين فيه.

كلنا ندري ان المعرض عبارة عن ناس تعرض بضاعتها يعني معرض مشاريع صغيرة. يعني باختصار ان الكويتي ربط افتخاره ببيع الأكل أو البضاعة أو الخدمات.

ليش؟ لأن الكويتي إنسان مترف فلما يبيع كوكيز ولا يسوي كب كيك بايق وصفتها من النت عنده شي واو وانجاز كبير.

طبعا من حق الإنسان انه يفتخر ببضاعته لكن المشكلة بإسم المعرض الوسيع. يعني لو سميتوا المعرض معرض المشاريع الصغيرة أو من صنع يدي أو من صنع خدامتي فمحد راح يطنز.

لما تسوي معرض كويتي وافتخر المفروض يكون عبارة عن انجازات الكويتيين مثل طارق القلاف البطل في مبارزة المعاقين أو انجاز الدكتور الفلاني اللي أول من سوا العملية الفلانية بالكويت. ولا فلان اللي رفع علم الكويت في قمة أفريست.

رد واحد من الشباب كان شنو ذنب المنظم إذا هذول اللي يشاركون بالمعرض؟

الجواب بسيط: يقدر يرفض هالنوع من المشاركات لكن موني توكس.

الخلاصة: معرض مشاريع صغيرة اسمه وايد كبير عليه والله يوفق اللي يسوون كب كيك

Don't forget to follow me @bo_hamad82

هواية التصوير والخدعة اللي عايشين فيها عيال هالايام

اكثرت في الاونة الاخيرة في العالم وخصوصا في الكويت هواية التصوير الفوتوغرافي وكلامي اللي بكتبه راح يجرح كثير من الناس وخصوصا في تويتر. شمعنى تويتر؟

لأن كثير من المغردين تلقاهم كاتبين في حساباتهم:

هاوي تصوير

التصوير هوايتي

مولع بالتصوير

الكاميرا هي حياتي

واخذ من هالحجي وطبعا معيشين روحهم الجو انهم فنانين تصوير. السؤال ليش معيشين روحهم الجو انهم فنانين؟ الجواب بسيط ولكن راح اخلي مقدمته بعدة اسئلة؟

قط مرة رأيتم فنان يغني على خشبة المسرح لايڤ يوقف غنائه ويرد يعيده ولا يفلتر صوته؟

المغني اللي بس يسجل صوته بالاستديو ويعدله فبرنامج كمبيوتر ويغني الاغنية اكثر من مرة ويختار الافضل ليس بفنان.

قط مرة شفتم فنان رسم يعيد رسمته اكثر من مرة؟

التصميم الجرافيكي لا يعتبر فن لانك تعدل وتعيد وتزيد اول مرة.

على نفس الوزن تصوير هالايام. اللي يصور بكاميرا رقمية ويشوف لقطته اول ما يصورها واذا مو عاجبته يعيدها امثر من مرة وبالبيت يعدل بإضائتها بالفوتوشوب ما يستحق كلمة فنان تصوير.

الفنان من كان يستخدم الكاميرا ام فلم ويستغل الاضاءة المتاحة لديه و بعدين عقب ما يحمض الفلم يشوف صورته اذا حلوة ولا لأ.

فشتان ما بين مصور الامس ومصور اليوم.

فاسمحولي يا مصورين اليوم فانتوا مو قاعدين تسوون شي خارق للعادة فاي واحد الحين يقدر يصير مصور والدليل كثرتكم.

واللي يزعل من كلامي مشكلته


- Posted using BlogPress from my iPad