هالبوست راح يزعل ناس وايد منهم زوجتي و من ربعي ومن نسباني بس خل يستحملوني
انشهر الكويتيين باستغلال انستقرام كسوق لتسويق منتجاتهم اللي انا شراء اي منتج أو خدمة تنباع عن طريق ناس ما تسوي اكاونتات بانستقرام . يعني بالعربي الفصيح محلي اهو اكاونتي ولي اسبابي طبعا
السبب الرئيسي لانتشار ظاهرة البيع عن طريق الانستقرام إن هالنوع من البزنس ما يحتاج رأس مال ولا لمكان ولا لعمالة متخصصة و متدربة ولا تراخيص و لا لوية وزارة الشؤون والمطافي و البلدية ومن هالسبب تترتب نتائج اتخليني ما اتعامل ولا افكر اشتري عن طريق هالسوق الجديد
النتيجة الأولى اهي تدافع الناس للاسترزاق من ورا هلابلكيشن وبالتالي صار الوضع كل من طق طبله قال انا قبله وبطلع لي جم بيزة من ورا هالابلكيشن
النتيجة الثانية واهي مترتبة عالنتيجة الأولى هي بيع منتجات باسعار مبالغ فيها عن طريق طلبها من النت وبيعها لك
مثال حي: كاميرا لمراقبة الاطفال تنباع بأمازون بخمسين دينار واصلة الكويت يبيعها لك اكاونت بثمانين دينار. بدال لا
تشتريها من هالاكاونت اطلبها انت ووفر ثلاثين دينار
أو طبخ اكل وبيعه لك اغلى من المطاعم علما بأن تكلفة هالاكل تطلع على صاحب الاكاونت أقل من المطعم والطامة الكبرى إذا كان هالاكل ما ينبلع من ناحية رداءة الطعم مثل اختي لما طلبت كيكة بثلاثين دينار حق عيد ميلاد ولدها وبالأخير انقطت بالزبالة لان طعمها فعلا سيء. وطبعا ما يندرى شنو الظروف اللي تحضر فيه الاكل لان لا ترخيص صحي ولا عماة عين
والكارثة هي بيع الخدمات واللي اهي يبيلها خبرة بتوفيرها ويبيلها احتراف في خدمة العملاء وكسب رضاهم ولكن اعيد واقولها ان احنا عايشين بين ناس كل من طق طبله قال انا قبله وهذا سبب كتابتي لهالمقال
أمس كان عيد ميلادي وكعادة زوجتي حبت انها تفاجئني و اهي كل سنة اتبدع بالاحتفال بعيد ميلادي عن السنة اللي قبلها
زوجتي ركبتني بسيارتها عالساعة ثمان بالليل وودتني نشرب قهوة بذا فيلج وانا حاس فيها انها مو على بعضها ومن اول ما ركبنا السيارة والتلفون ما نزل من ايدها ما بين مسجات ومكالمات وعالساعة ٩:٢٠ ردت ركبتني السيارة واربطت عيني علشان ما اشوف وين بتوديني مشت شوية ونزلت من السيارة وهدتني بالسيارة وعيني مربوطة لي الساعة ١٠
عقبها قالت لي خلاص افتح عينك ماكو فايدة ولما فتحت عيني ولا انا عالبحر الي ورا ذا فيلج وفي قعدة عالبحر اللي يكون فيها شموع وطاولة وشفت المنظر واستانست
وانا قاعد امشي عالتراب وياي زوجتي ما اشوفها فجأة ولا قاعدة تبجي
يا مرة شفيج؟ قالت ان القعدة فاضية والمفروض احنا نكون موجودين من الساعة ٧:٣٠ لكن البنت اللي تتعامل وياها مسكرة جهازها وموقادرة احصل اي احد من رواعي الاكاونت غير العامل الهندي و قال لي راح يتأخر لي الساعة ٩ وظليت متعلقة لي الحين يعني الساعة عشر
وفعلا قعدنا والمكان فاضي
فوق الساعة عشر يانا هندي بتاكسي وياب الاغراض جان تسئله زوجتي انت وينك مواعدني من ٧:٣٠ وماييت الا الحين
جان يقول لها كنت بالعبدلي عندنا زباين غيركم
وعقب ما صف الاغراض قال يبي الحساب (١٦٠ دينار) ورديت عليه زوجتي ماني معطيتك حسابي ويا معزبينك
ما طافت ٥ دقايق ولا الهندي ياي وياه تلفونه يقول حق مرتي اتكلمي بالتلفون ولا البنت اللي جهازها مسكر سبحان الله وقت الفلوس ردت اطلعت
الحديث كان اختصاره انكم واعدتوني بوقت واتأخرتوا علي ساعتين ونص واختفيتوا والحين توكم يايبين الاكل الساعة عشر وتبوني افضي المكان بعد ساعتين. على الاقل جان قلتوا انكم ما تقدرون وكنسلتوا الموضوع ولا هالتعلوقة هذي وحسابكم ماني دافتعته
طبعا هم كان من المفروض ان زوجتي دامها شافت ان لي الساعة ٩ ومحد منهم شرف اهي اللي تكنسل الموضوع لكن هم ما تنلام لأنها تبي تحتفل
عالعموم ردت البنت قالت هالمشروع مو مشروعي واخليج اتكلمين رواعي المشروع
بعد دقيقتين رجع الهندي بايده التلفون راعي المشروع عالخط يبي يكلم زوجتي وبعد شد وجذب بيني وبين المدام أصرت ان اهي اللي تكلمه وقالت له الوضع اللي صار وانها ما راح تدفع والظاهر انه عرض عليها خصم ٦٠ دينار وقال لها ابي تكلفتي بس ١٠٠ دينار وقالت له غير الخمسين ما راح تشوف والظاهر انه قال لها دام جذي انا عندي تصرف ثاني و انتهت المكالمة
رد اتصل عالعامل ماله وانا اللي شلته وقلت له ليش تحرقون قلب المرة جذي ورد قال لي انا مو بدون اتكلمني جذي انا كويتي ولو انها مكلمتني باسلوب محترم جان راضيتها لكني علشانك انزل لكم لي الثمانين دينار وقلت له المرة اهي اللي راح تدفع ومالزمه عالخمسين فرد وقال دام جذي فضوا المكان واتوكلوا على الله
اختصار الموضوع
المرة مواعدينها ان تكون القعدة موجودة من الساعة ٥ وراح تنشال ١٢ نص الليل لكن لسوء الاحوال الجوية تأجلت لي ٧:٣٠ لي نص الليل
الساعة ٧:٣٠ البنت اللي ماسكة الموضوع قالت حق مرتي البطارية بتطفي وعطت زوجتي رقم العامل
العامل قال بتأخر ساعة ونص يعني الساعة ٩
الساعة عشر الاربع القعدة انحطت بدون أكل
فوق العشر بربع ساعة انحط الاكل واهي عبارة عن شوية برتقال وافندي واناناسة وصحن بيتزا وصحن زلابية وعنقود عنب ومطارة شاي ومطارة قهوة وكيكة وجم قوطي بيبسي وجم قوطي عصير كي ديدي وجم بطل ماي وفحم وقوطي عرايس امريكانا وقوطي همبرجر خزان و باكيت هوتدوج وجيسين صمون
السعر ١٦٠ والتكلفة على ادعائه ١٠٠ دينار ولكم الحكم
المدام ما كانت قادرة توصل لرواعي الاكاونت
وصل لهم خبر ان الفلوس ما راح تندفع بسبب التأخير الماصخ فجأة طلعوا
يا تدفعون يا تفضون المكان
انا مو بدون اتكلموني جذي
لو مرتك مكلمتني باسلوب محترم جان صار وياها تصرف ثاني
احنا مضغوطين عندنا زباين غيركم بالعبدلي
التحليل
عدم احترام المواعيد ولو العذر كان الضغط فعليك اتعرف حدودك بتوفير الخدمة وتحترم الزباين وتلغي التزامك
عدم احترام زباينك لما حسيت انك خايرها وتختفي واترد تطلع بقدرة قادر ان الفلوس ما راح تندفع
عدم المقدرة على التفاوض وكسب ود الزبون وتوفير بديل بدال يا تدفعون يا اتفضون المكان
الربح الفاحش لما اتقول تكلفتي ١٠٠ دينار وانت الاغراض اللي حاطها لو اروح جمعية واشتريهم ما يطلعون بخمسين دينار ولا تتعذر بأثاث القعدة لان غير الشموع الاغراض كلها تستخدمها مرة ثانية فقيمتهم مطلعها من زمان
كلمة انا مو بدون اتكلموني جذي انا كويتي بينت لنا مستوى التفكير الضحل فاحنا مانفرق بين الاوادم بسبب جناسيهم
الغلط على زوجتي لما يقول لو مكلمتني باسلوب محترم يعني جنها اهي مو محترمة معلش طوفناها
ولو انها مكلمتني باحترام جان كان لي تصرف ثاني يعني باختصار انت اللي تبيع الخدمة وانت اللي تملي علينا شروطك
بالختام نفس ما قلت بالمقدمة ان التجارة لها ناسها لكن الشرهة على انستقرام اللي خلى كل من هب ودب بيدش بالتجارة
واتفضلوا شوفوا الصورة من اكاونتهم بعد ما فضينا لهم المكان وشوفوا الاكل اللي حاطينه اللي تكلفته ب١٠٠ دينار ولكم الحكم وانا متعمد اني مغطي ويوهم احتراما لخصوصيتهم وخل يقولون احنا مو محترمين
